நீரூற்று

வாழ்க்கைப் பயணங்கள் அனைத்தும் ஒரு நீரூற்றைப் போன்றானதொன்றேயென எப்பொழுதும் நம்பும் நான், அவ்வூற்றின் வழி பிறந்த அந்த ஓடையினூடே பயணிக்கும் என் எண்ணங்களை, எண்ணக் குவியல்களை எழுத்தென்னும் தூரிகையால் வண்ணக் குவியல்களாக்கி உங்கள் பார்வைக்கு வைக்க விழைகிறேன்!

என் எழுத்துக்களினூடே எப்போழுதும் உங்களுக்கு உடன்பாடு தோன்றாதிருக்கலாம்! அப்படி தோன்றவேண்டுமென்ற அவசியமும் ஒருபோதுமிருப்பதாக நான் எண்ணுபவனும் அல்ல! உடன்பாடுகளூடே இயன்ற மட்டும் முரண்பாடுகளும் இருந்தால்தான் வாழ்க்கைப் பயணம் இனிமையானதொன்றாக இருக்கக் கூடும்!

முரண்பாடுகள் தோன்றும்போதெல்லாம் இவ்வோடை தன் பாதையிலிருந்து விலகிச் சென்று வேறு பாதையில் ஓடிவிடாதபடி கரையோரங்களில் நீங்கள் கனமாய், கவனமாய் கருத்துச் சுவர்களை எழுப்பி வைக்கலாம்! ஆயினும் அச்சுவர்கள் ஓடையின் இயல்பை மாற்றிவிடாதிருக்கட்டும்!

எழுத்தின் இயல்புகளை, வடிவங்களை வாசித்தும், சுவாசித்தும் இருந்திருந்த எனக்குப் "பகலவன் பிரமீளா" என்ற புனைப்பெயரொன்றைச் சூட்டி கைபிடித்து வலையுலகின் வடம்பிடிக்க வைத்த நேசமிகு அன்பர்

மோகன்ராஜ் (எ) கைப்புள்ளை

அவர்களின் அன்புடனும், ஆசியுடன் உங்களுடனான உரையாடல்களைத் தொடங்க இருக்கிறேன்!

வலையுலகு என்னை வாஞ்சையுடன் தழுவிக்கொள்ளும் என்று நம்புகிறேன்!

இப்படிக்கு,
பகலவன் பிரமீளா!